04.03.2024ж. Алматы гуманитарлы-экономикалық университеті, Педагогика, бизнес және құқық институтының Педагогика, психология және әлеуметтік-гуманитарлық пәндер кафедрасы профессор-оқытушылар құрамының ұйымдастыруымен “Мұқағали — мәңгілік ғұмыр” тақырыбында жыр кеші өтті. Кешке ақиық ақынның ұлы Жұлдыз Мақатаев, келіні Бақытгүл Айдарова,  “Мұқағали” журналының бас редакторы Дүйсен Мағлұмов және М. Мақатаев сөздеріне жазылған әндердің шебер орындаушысы “Алатау” өнер театрының актері, “Үш қоңыр” тобының әншісі Нариман Қажымұратұлы, бірнеше жыр жинақтарының авторы, ақын Асхат Сүйіндік, сазгер, әнші Еркін Тоқсейітов шақырылды. Ақынның ұлы Жұлдыз Мақатаев студенттерге әкесі жайлы тамаша естеліктер айтса, келіні Бақытгүл Айдарова ақын мұрасын насихаттауда жасалып жатқан жұмыстармен бөлісті. “Мұқағали” журналының бас редакторы Д. Мағзұмов ақын атындағы журналдың жастар үшін маңыздылығына тоқталды. Сондай-ақ кеш қонақтары Нариман Қажымұратұлы М.Мақатаевтың сөзіне жазылған Т.Рахимовтың әндерін шырқап, Асхат Сүйіндік ақынға арнау оқыды. Әнші сазгер Еркін Тоқсейітов қос алыптың үлгісімен жазылған А. Сүйіндік екеуінің туындысы “Аягөз ағады” әнімен, Гүлнұр Өмірбаева “Мен нағыз махаббатты армандаймын”, Ұлан  Карибаев “Есіңе мені алғайсың” әнімен кештің көркін кіргізді. Сонымен бірге студенттер ақынның өлеңдерін оқып, шығармаларынан қойылым көрсетіп, кештің әсерін әрлей түсті.
Аталған кеш студенттер үшін рухани тәрбиеге толы болды.