2022 жылдың 2 маусымында «Clay House art rooms» галереясында «Сымбат» Дизайн және Технология Институтының оқытушылары: Асанова Б., Жаманбаланова А., Скобелева Г., Мақажанов Р., Мизанбаев Р. және Григорян В. жұмыстары қойылған «Көктемгі тербеліс» көрмесінің ашылуы өтті.
Көрменің ашылуына суретшілердің әріптестері, достары мен туыстары, сондай-ақ сүйікті қаламыздың өнер сүйер қауымы заманауи өнер туындыларын өз көзімен тамашалауға келді.
Көрме ашылуында өнертанушы, Суретшілер одағының мүшесі, «Егемен Қазақстан», «Новое поколение», «Вечерний Алматы» газеттерінде мақалалар жариялайтын, Қазақстан өнері тарихына қатысты материалдардың авторы Мария Жұмағұлова сөз сөйледі. Мария Төлегенқызы мынадай пікір білдірді: «Мен «Сымбат» Дизайн және Технология Институтының көптеген суретшілерімен таныспын. Бұл ұжымда ерекше дарынды суретшілер жұмыс істейді және оқу мекемесі басшылығы бұл университетте шығармашылық атмосфера орнауына жағдай жасаған. Университет оқытушылары мен студенттеріне өздерінің шығармашылық идеяларын әртүрлі материалдар мен жанрларда: графика, кескіндеме, қолданбалы өнерде іске асыруға мүмкіндік берілген».
Университет басшысы Асанова Сабыркүл Жайлаубекқызы әр суретші – университет оқытушысы туралы ерекше жылы лебіз білдірді: «Мен үшін олар ең алдымен ұстаздар. Бірақ олар тек педагогикалық дәрежесі бар ұстаздар ғана емес, студенттерді қызықтыратын шығармашыл тұлғалар. Ұжымымыздағы әрбір шығармашылық қызметкердің өз орны бар, әрбір шығармашылық қызметкер алтынмен бағаланады. Олардың әрқайсысы алмаздың бір түріндей. Қазақ: «Жақсыны жақсы десең - бір уыс ет өседі, жаманды жаман десең - бір уыс ет өледі» дейді. Осы жағдайлар арқасында біздің мекемеміздің өмірі жалғасуда. Аккредиттеу комиссиялары біздің жетістіктерімізді, оқу орнымыздың даралығын мойындайды». Сабыркүл Жайлаубекқызы осы көрменің кураторы Владимир Георгиевич Григорьянды ерекше атап өтіп, ол әртүрлі көркем жанрларда жұмыс істеп қана қоймай, ғылыми мақалалар да жазатындығына назар аударды. Сабыркүл Жайлаубекқызы баршаға шығармашылық, жеке табыс, денсаулық тіледі.
Әрбір суретші өзіндік ерекше қолжазбасымен және жұмыс стилімен ерекшеленеді. Егер Балнұр Асанованың шығармалары композициясы тамаша үйлестірілген таза түстердің таңғаларлық үйлесімді ауысулары арқылы қуанышты, өмірсүйгіш дүниетанымды жеткізсе, Владимир Григорьянның шығармаларынан бояу қабаттары үсті-үстіне салынған терең күлгін-көк және көгілдір түстердің реңктер үйлесімділігі арқылы берілген мистикалық философиялық мағынаны көруге болады. Рахман Мақажанов шығармаларында көне қазіргі дүниетанымда бейнеленген грек мифологиясының сюжеті мен «Малевич» тақырыбына өзіндік интерпретациялау көрерменге күтпеген әсер береді.
Арай Жаманбаланова шығармаларында автордың мастихин штрихтары нәзік түс ауысуларының жарқын сезімдерді жеткізуіне кедергі келтірмейді. Көрмеде Галина Скобелеваның бізді түрлі-түсті жарқыраған қауырсынды жұмақ құстары, гүлдері мен табиғаты ерекше ертегі әлеміне жетелейтін сиқыр толы батиктері мен гобелендерін тамашалай аласыздар. Рамазан Мизанбаевтың сипат-сынды портреттері біздің күнделікті өміріміздегі қазіргі қаһармандардың ішкі жан дүниесін ашады. Аршагул Мелдештің мүсіндік туындысы кез келген әміршінің жалғыздығын бейнелейтін тақты бейнелейді. Бірақ айта кетер жайт, жалғыздық тек әміршілердің «серігі» ғана емес, сонымен қатар рухы жоғары адамдарға да тән жағдай, өйткені адамның рухани даму деңгейі неғұрлым жоғары болса, соғұрлым ол өмірде пікірлестерді сирек жолықтырмақ.
Көрме 17 маусымға дейін жалғасады. Бейнелеу және қолданбалы өнердің алуан түрлері мен жанрларының үлгілерін өз көздеріңізбен көруге асығыңыздар.